Баланың бас ұстазы – ата- ана

2017 жыл.  21 қазан. №60 жалпы білім беретін орта мектебі. Мерекелік көңіл-күймен мектепке жан–жақтан ағылған ата-аналар легі толастар емес. Бүгін «Рухани жаңғыру: Жарқын болашаққа бастар жол» атты жалпы ата-аналар жиналысы өтпек. Әр ата-ана өз болашағынан үлкен үміт күтеді, өзі жетпеген биікке ұрпағының жеткенін қалайды. Бүгінгі жиналысқа келген әр ата-ананың көзінен осындай ұшқынды байқауға болады. Жиналыс жалпы ата-аналар комитетінің төрағасы Боранбай Әлиұлының «Рухани жаңғыру – жасампаздық салты» тақырыбындағы баяндамасымен ашылды.

Күн тәртібіндегі екінші мәселе 2016-2017 оқу жылының қорытындысын жасаған №60 ЖББОМ директоры А.А Тажимишевтің есебінен басшының оқу – тәрбие ісіне жанашырлықпен қарайтынын бірден байқауға болады. «Жұмыла көтерген жүк жеңіл» демекші, бір жылда ауыз толтыра мақтанып айтарлықтай біраз шаруа істелгенін көзбен көріп, көңілге тоқып отырған ата-аналар мектеп басшысына дән риза екендіктерін  білдіріп, жиналыс соңында ризашылық білдірді.

Осыдан кейін мектеп директорының бастамасымен мектеп тынысына белсене араласқан ата-аналар марапатталды. Басшының қолынан мақтау қағазын алған ата-аналардың көзінде қуаныш нұры есіп тұр.

Бұл жиналыстағы қаралатын күрделі  тақырыптың  бірі  – 3 ауысымға көшу туралы мәселені таныстыру директордың бастауыш кластар жөніндегі орынбасарына жүктелді.

Тағы бір жағымды жаңалықтың бірі – 2017-2018 оқу жылында мектепте қосымша ақылы білім беру ісі жолға қойылып жатыр.

Бала тәрбиесіне жауапкершілікпен қарап, алтын уақыттарын арнап келген ата-аналарымызға мың тағзым!

Л.Т. Искарина