Бала шақтан болашаққа жолдама

2016-2017 оқу жылында  Нұр Ақтөбе мөлтек ауданынан ашылған  №60 жалпы  білім беретін мектеп ұжымы өзінің  алғашқы түлектерін мектеп қабырғасынан  қанат қақтырып, өмір жолына  аттандырып салды.

Кез келген білім ордасының басты міндеті-иманды ұрпақ, саналы шәкірт тәрбиелеу. Шәкірт шыңдауда  озық ой, тың идеяларымен бөлісе алатын тәжірибесі мол мектептер үздіктер қатарына шығып жатады. Алайда  Ақтөбе қаласындағы білім беру ұйымдарының қатарына бір жыл бұрын ғана қосылған  Тажимишев Абзал Амантаевич  басқарып отырған №60 жалпы білім беретін орта мектептің де  қаламыздағы іргелі мектептермен терезе теңестіре алар жайы бар.

Білім мен ғылым  қарыштап дамыған XXI ғасырда жаңа технологиямен жабдықталған  бұл  мектептің  мақсаты – айқын, арманы-асқақ. Ұстаздар қауымының жылы жүрегі мен мейірімге толы құшағы  шәкірттер жүрегінен жол тауып, үйлесімді үндестікпен  сабақтасып жатқаны  дәлел бола алғандай.  Білім мен тәрбиені ту еткен  мектеп ұжымы  бір жыл уақыт ішінде  айтулы  жетістіктерге  қол жеткізіп үлгерді. Алтын ұядан 70  шәкірт  негізгі орта білім алып, аттестат иемденсе, 16 шәкірт үлкен өмірге  жолдама алып, балалық шақты артқа тастап, болашаққа жол ашты, қияға қанат қақты.

Келешегімен  кемелденіп, болашағымен  бағытталған оқушылардың  білім көрсеткіштері де төмен емес. Оған дәлел, алғашқы түлектердің  алдыңғы қатарында «Алтын белгі» иегері де бар. Он алты тұлғаның  бірі де бірегейі, «Алтын белгі» иегері-Хамитов Алишер  есімі мектеп тарихында алтын әріппен жазылары анық. Он алты түлекке он алты тілек арнап, үміт артып отырған ұстаздар қауымының еңбегі ерен. Тұңғыш түлектердің  болашағының жарқын боларына мектеп ұжымы кәміл сенеді.

Қымбатты, алғашқы қарлығаштар! Өмір жолында кездеске қиындыққа мойымай, елге қызмет етер абыройлы азамат, тәрбиелі тұлға болыңыздар!      Сіздер салған жол-дара, бағындырар белестер – биік, армандар – асқақ.

Ақ жол, жас түлек! Жаңа мектептің жылдық жетістігі  жарқын болашаққа жол бастайды, келер ұрпаққа жол сілтейді. Алар асуың мен шығар шыңың  көп болғай, Алтын ұям! Бала шақтан болашаққа жолдама беріп,талай түлектерді ұшыратын, киелі қара шаңырақ сыңғырлаған күміс қоңырауыңмен, бақытты ұрпағыңмен жасай бер!

Романова Мейрамгуль Картаевна