Нұр себеле, Ұлыстың ұлы күні!

Самарқанның көк тасы жібіп, ел арқасы кеңейген тұста келетін Ұлы мереке – Наурыз баршамызға құт-береке әкелсін! Тарихи тамыры тереңге бойлаған әз-Наурыз дана халқымызда қай кезде де еңсесі биік елдіктің іргесі сөгілмес бірліктің, ырыс пен ынтымақтың мерекесі болып келеді. Қазақстан халқы үшін Наурыз мейрамы – табиғаттың жаңаруын айшықтайтын6 мерейі тасыған ұлы мереке. Қазақ халқы Наурыз мерекесін  айрықша бағалап, оны жыл сайын тойлап отыруды дәстүрге айналдырған. Осы дәстүрді жалғастыра отырып, ата-бабамыздың ұрпақтан-ұрпаққа беріліп келе жатқан ұлттық мерекесі – Наурыз туралы түсінік бере отырып, Ұлыстың ұлы күні айтылатын бата-тілектердің, наурыз көженің маңызын ұғындыру, xалқымыздың өнерін, мәдениетін қастерлеуге тәрбиелеу мақсатында мектебіміздің 1-11 кластарында класс сағаттары ұйымдастырылды. Атап айтар болсақ, мектепалды даярлық топтарында “Кел, төрле, мейірлі Наурыз”, 1 кластарда “Қош келдің, әз Наурыз!”, 2 кластарда “Наурыз айы туғанда, той болушы еді бұл маңда”, 3 кластарда “Салт-дәстүрім – сарқылмайтын қазынам”, 4 кластарда “Батырлар ауылында – Наурыз тойы! (ұлттық ойындарға негізделген), 5 кластарда “Дәстүрімді жаңғыртқан – әз Наурызым!”, 6 кластарда “Наурызым – дәстүрлі ізгілігім!”, 7 кластарда «Наурыз – көктем, жүректерге нұр сепкен!», 8 кластарда “Сал-серілер керуені”, 9 кластарда “Нұр себеле, Ұлыстың ұлы күні!”, 10-11 кластарда “Армысың, Алаш елі, армысың, Әз-Наурыз!” атауларымен ашық тәрбие сағаттары өткізілді. Оқушылар ұлыстың ұлы күнінде Қызыр бабамыздың кейпіне еніп, ата салтымыз бойынша ақ батасын берді және ойын-күлкінің сәні болған Қожанасыр мен Алдаркөсе болып, өнерлерін ортаға салды. Бұдан бөлек, домбырамен ән әуелетті, мың бұралып би де биледі. Қазақ халқының ұлттық ойындары ойнатылып, ұлттық тағамдардан жайылған дастарқаннан дәм татты.
Наурыз – көктемгі жаңарудың, махаббаттың, ақ пейіл мен татулықтың мерекесі. Ол – өткенді саралап, болашағымызды болжайтын ерекше кезең. Ақ ниетпен өткенге салауат айтып, ақ тілекпен жаңа күнді қарсы алайық! Отанымызға – береке, халқымызға – игі істер, мемлекетімізге – молшылық, ал әр шаңыраққа бақыт пен шаттық тілейміз. Еліміз өркен жайып, Наурыз баршамызға ынтымақ пен сәттілік ала келсін! Ұлыстың Ұлы күні құтты болсын!