1 Мамыр – Қазақстан халықтарының бірлігі күні

1 Мамыр – Қазақстан халықтарының бірлігі күні. Бүгінгі мереке – бейбітшілік пен достықтың, бірлік пен берекенің, ырыс пен ынтымақтың белгісін айшықтайтын мерейлі күндердің бірі. Жыл сайын дәстүрге айналған мерекеде Қазақстан аумағында тұрып жатқан көптеген ұлт пен ұлыс өкілдері киелі қара шаңырақта тату-тәтті, бейбітшілік пен ынтымақта өмір сүріп жатқандығын ұлықтайды. Көптеген ұлттардың ортақ шаңырағына айналған Қазақстан бейбітшілік пен келісім арқылы әлемге үлгілік жолды нұсқап келеді. Ұлттар арасындағы бірлікті қамтамасыз ету – демо­кра­тия­лық, зайырлы, құқықтық және әлеуметтік мемлекет құрудың маңызды шарты. Сонымен қатар, ұлы далада орныққан ел бірлігін мерекеге ұластыру, әлемдік қауымдастық тарапынан жоғары бағаланған достық пен келісімді паш ету – халықтар арасындағы тұтастықты одан сайын нығыздай түседі. Халықаралық достық күнінің тағы бір ерекшелігі – түрлі ұлт мәдениетіне құрметпен қарауға бағытталған қоғамдық ортада жастарды, соның ішінде, болашақ көшбасшыларды тарту болатын. Осы орайда, № 60 ЖББОМ ұжымы Нұр Ақтөбе ықшам ауданының тұрғындарына арнап, “Қазақ елі жасасын!” атты салтанатты мерекелік бағдарламаны тарту етті. Аталмыш мерекені жоғары деңгейде атап өтіп, өнерлі ұстаздар мен оқушылар ашық аспан аясында ән қанатын әуелетіп, бимен әртүрлі ұлт тілін, салт-дәстүрін өрнектеді, қара домбыраның қоңыр үнін күмбірлете көрерменге ерекше көңіл-күй сыйлады. Мерекелік шара соңында білім ордасына көрермен болып келген дүйім жұртшылық ризашылықпен жүрек жарды лебіздерін жолдады.

ТӘРБИЕ БӨЛІМІ