“Бақытты бала” субұрқағы

Облыс басшысы Бердібек Мәшбекұлы Сапарбаевтың бастамасымен биылғы жыл балалар жылы аталып, «Бақытты бала-Мәңгілік ел кепілі» жобасы аясында мектеп ауласынан жақын арада «Бақытты бала» атты субұрқағы бой көтерген болатын.
Осыған орай, бүгін, 24.05.2018 ж. күні мектебімізде “Нұр Ақтөбе” мөлтек ауданы тұрғындарының және мектеп оқушыларының көптен көптен күткен қуанышты жаңалықтарының бірі – субұрқақтың ашылу салтанаты өтті. Мектеп ауласында бой көтерген аталмыш субұрқаққа мектеп ұжымы мен оқушылар, жергілікті тұрғындар жиналды.
Шараға қала әкімінің орынбасары Күлпаршын Айдарханова келіп, тұсаукесер рәсіміне қатысты.
Аталмыш шарада салтанатты түрде мерекелік концерт бағдарламасы ұйымдастырылып, мектеп директоры А.А.Тажимишевтың қолдауымен “Бақытты бала” субұрқағының құрылыс жұмыстарына белсене ат салысып, аянбай еңбек еткен мектеп ұжымындағы ер-азаматтар қала әкімі орынбасарының қолынан құрмет грамоталарын алды.
Салтанатты шара соңында жергілікті тұрғындар субұрқақтың іске қосылу рәсіміне куә болды. Қас-қағым сәтте субұрқақтың су ағыны мектеп айналасына салқын самал леп беріп, таза ауаға бөледі. Осы сәтті тағатсыздана күткен мектеп оқушылары субұрқақтың айналасында асыр салып ойнап, балғын балалық шақтың қызығына батты.
Алдағы уақытта жаңадан ашылған субұрқақ мөлтек аудан тұрғындарының жазғы демалысын тиімді өткізетін қоғамдық-мәдени орындардың бірі болары сөзсіз.