Жаңа оқу жылы жаңа міндеттер жүктейді

«Мұғалімдік мамандық – бұл адамтану, адамның күрделі және

қызықты, шым–шытырығы мол рухани жан дүниесіне үңіле білу.

Педагогикалық шеберлік пен педагогикалық өнер –

ол даналықты жүрекпен ұға білу болып табылады».

В.А.Сухомлинский

Егеменді еліміздің өсіп келе жатқан ұрпағын ойлы да іскер, жігерлі де батыл, өзіне-өзі сенімді, интеллектуалдық деңгейі биік, дүниетанымы дұрыс қалыптасқан азамат етіп тәрбиелеуде мектептің алатын орны айрықша. Мектеп қазіргі қоғамның дамуымен, әлеуметтік практикамен тығыз байланысты. Мектеп өмірі балаға жаңа әлемнің есігін ашып беріп, рухани дүниесінің қалыптасуына негіз салады. Енді санаулы күндерден соң барлық метептерде жаңа оқу жылының қоңырауы соғылады. Жаңа оқу жылына дайындық әрбір білім ұясына үлкен жауапкершілік жүктейді. Қаншама бала мектеп табалдырығын аттайды. Мектеп деген бейтаныс әлемге қадам бастайтын бүлдіршінге білім нәрімен сусындауға келген мектебі бірінші күннен-ақ жақсы әсер қалдыруы тиіс. Сол себепті №60 жалпы білім беретін орта мектепте өткен бастауыш кластар әдістемелік бірлестік отырысында бастауыш класс мұғалімдері 2017-2018 оқу жылының  жұмысын тағы бір түйіндеп, жаңа 2018-2019 жылдың ұсынар жаңалығына назар салды. Алғашқы отырыс “Төртінші өнеркәсіптік революция жағдайындағы адами капитал” тақырыбында өтті.

Отырыс барысында бірлестік жетекшісі Г.С.Конарова жаңа оқу жылына арналған әдістемелік нұсқау xатпен таныстырып өтті. Сонымен қатар жаңартылған білім беру бағдарламасы бойынша өзекті мәселелер қаралып, мұғалімдер арасында қызу талқыланды. Бірқатар ұстаздар, М.Е.Ерназарова, А.А.Жанаева, В.Биманова өз тәжірибесіндегі әдіс-тәсілдерді ортаға салды. Отырыс  барысында саланың жетістіктері мен олқы тұстары айтылып, алдағы оқу жылында атқарылар міндеттер сараланып, талқыланды.