Жаңа технологияның тиімді әдіс-тәсілдері

Қазіргі заман ұстаздарының негізгі мақсаты – білім алушыларға сапалы білім беру және оқушының толыққанды жеке тұлға болып қалыптасуына мүмкіндік жасау. Осы мақсатты жүзеге асыру үшін соңғы уақытта оқытудың жаңа технологиялары жасалып, мектеп өміріне енгізіліп қолданылуда. Мектеп өміріне еніп отырған жаңа технологиялардың ерекшелігі – оқушыны жан-жақты дамыту.
Ұстаз ретінде өз білгеніңді өзгелерге үйрету үшін, ең алдымен, соны қалай үйрету керектігін білуің шарт. Мектебіміздің Г.Т.Сандыбаева, С.Ж.Қожан секілді тәжірибелі ұстаздарымыз, «Рухани жаңғырған елдің болашағымыз» атты 4-кластар аралығында өткізілген апталық жоспарына сәйкес, 22 қарашада сабақта қолданатын жаңа технологиялардың тиімді әдіс-тәсілдерін әріптестерімен бөлісу мақсатында тәжірибе алмасу семинарын өткізді. Бұл тәжірибе алмасу семинарында көптеген әдіс-тәсілдер мұғалімдердің қатысуымен бірлесе отырып жүргізілді. Сабақтың жоғары деңгейде өткізілуі – мұғалім шеберлігіне тікелей қатысты болатын болса, мұғалім шеберлігін ұштау мақсатында семинарда «Биле және бейнеле» әдісі, «Маршрут» әдісі, «Кезбе тілші» әдістері секілді біршама тиімді әдіс-тәсілдер туралы түсінік беріліп, әр мұғалім аталған әдіс-тәсілдерді өз әдістемелік қоржындарына жинақтады деп айта аламыз. Оқытудың жаңа педагогикалық технологияларын меңгеру мұғалімнен шығармашылық ізденіс пен іскерлікті талап ететіні мәлім. Мұғалімнің өзін-өзі жетілдіруі үшін бұл тәжірибе алмасу семинарының пайдасы мол болды. Себебі, семинар барысында үйренген әдіс-тәсілдерді мұғалімдер әр сабағында шығармашылықпен пайдаланып, түрлендіріп жүргізуіне түрткі болады деп сенеміз.