«Зерденің» зерделі ұландары

Қазіргі кезеңде республикамызда білім берудің жаңа жүйесі жасалып, әлемдік білім беру кеңістігіне енуге ұмтылыс бар. Бұл педагогика теориясы мен оқу-тәрбие үрдісіндегі елеулі өзгерістерге байланысты болып отыр: білім беру парадигмасы өзгерді, білім берудің мазмұны жаңарып, жаңа көзқарас, жаңаша қарым-қатынас пайда болды. Осы себептен де әр ұстаздың алдында оқушыға жаңаша білім беру үрдісін қалыптастыру міндеті тұр десек, сол міндеттің бірі оқушының өз бетімен білім алуға құлшынысын арттыру, әр түрлі әдіс-тәсілдер арқылы олардың ізденушілік қабілеттерін дамыту болып саналады.

Осымен байланысты жас ұрпақтың терең білім алып, ой-өрісін өсіріп, шығармашылықпен жұмыс істей алуына жағдай туғызу, сөйтіп әрбір оқушының өзін-өзі дамытуына, өз мүддесі мен қызығуын қанағаттандыруына ынталандыру, бойындағы қабілетіне сай білімін ұштауына ықпал жасауға бағытталған жобалар көбейді.

Сондай жобалардың бірі жас зерттеушілер жұмыстары мен шығармашылық жобаларынан тұратын «Зерде» облыстық конкурсының басты мақсаты – балалардың танымдық қызығушылықтары және зияткерлік-шығармашылық әлеуетін ынталандыру болып табылады. Оқушылардың зияткерлік шығармашылығын мектеп жасынан дамыту, бала кезінен ғылыми ізденіс жұмыстарына қызығушылығын ояту; – ғылыми-техникалық және зияткерлік шығармашылық саласында қабілетті және дарынды балаларды айқындау, оларға қолдау көрсету; – оқушылардың жоғары жетістіктерін, білім беру ұйымдарының оқу және ғылыми ізденістегі жұмыс тәжірибесін, өзара қарым-қатынасын ұйымдастыруды насихаттау және таныту; – педагогикалық кадрлардың кәсіби шеберлігін жетілдіру; – қоғамның зияткерлік әлеуетін дамыту мәселесіне көпшіліктің назарын аудару – конкурс міндеттеріне кіреді.

Бала бойындағы бейімділікті байқай алу, қабілетті оқушыларды ерте анықтау, оларды тәрбиелеп, білім беру жүйесін жетілдіру, оқушының дүниетанымын кеңейту, оларды зерттеушілік қызметке баулу, ізденушілік қасиеттерін жетілдіруде №60 жалпы білім беретін мектептің де үлесі зор.

Соның жарқын бір айғағы 2018 жылдың 26 қазан күні «Зерде» облыстық ғылыми жобалар байқауында 4 «Ж» класс оқушыларының қазақ әдебиеті бағытындағы жұмыстары жоғары бағаланып, бастауыш класс мұғалімі Сәуле Қожанның жетекшілігімен Т.Таубек, Н.Нағымова – жүлделі 3-орынды иеленді. Ғылымның көзі зерделеуде алдыңғы қатарды бағындырған жас ғалымдарымыздың білім шыңынан көріне берулеріне, мектебіміздің өнегелі ұстаз, зейінді шәкірттерімен көбейіп, көркейе берулеріне тілектеспіз.