Латын әліпбиіне көшу – рухани жаңғыру талабы

Рухани жаңғыру – ұлттық сананы жаңғыртуға бағытталып отырған идея. Яғни, ұлттық құндылықтарымыз бен озық дәстүрімізді табысты жаңғырудың алғышартына айналдыру.

Қазақ елінің бірінші жаңғыруы – еліміз тәуелсіздік алып, өз алдына дербес мемлекет болып тарих сахнасына шығу кезеңінен бастау алған болатын. Екінші жаңғыру «Қазақстан – 2030» стратегиясының қабылдануымен және Елордамыз Астананың бой көтеруімен басталып, үшінші жаңғыру – Елбасымыздың өткен жылдың сәуір айында жасаған «Болашаққа бағдар: рухани жаңғыру» мақаласымен жалғасын тапты. Бұл іргелі мақала – еліміздің әлемдегі ең дамыған 30 елдің қатарына кіруді мақсат еткен, қазақ қоғамының рухани дамуына жол ашатын, барша қазақстандықтардың жаппай қолдауына ие болған тарихи бастама. Аталған игі бастамада Елбасымыз рухани жаңғыру жолында таяу жылдары атқарылуы тиіс негізгі міндеттерді анықтап берді. Соның бірі – қазақ тілін біртіндеп латын әліпбиіне көшіру жұмыстары. «Бұл – қазіргі заманғы технологиялық ортаның, коммуникацияның, сондай-ақ, XXI ғасырдағы ғылым мен білім беру процесінің ерекшеліктеріне байланысты» – деп, елбасшымыз латыншаға көшудің терең логикасы бар екендігін айтқан болатын. Осы бағытта 2018 жылы 14 қарашада еліміздің барлық аумағында Жалпыхалықтық диктант өтті. Диктант республика бойынша сағат 11:00-де басталды. Бұл іс-шара – қазақ әліпбиін латын графикасына көшірудің бастама жұмыстары. Жалпыхалықтық диктант өткізудің негізгі мақсаты – жаңа әліпбиді меңгерудің практикалық дағдыларын қалыптастыру, латын графикасындағы қазақ әліпбиін насихаттау мен тарату. Аталған іс-шараға №60 ЖББОМ-ның барлық мұғалімдері мен 15 жасқа толған оқушылары ат салысты. «Рухани жаңғыру» тақырыбындағы диктант жұмысын қатысушылар белгіленген уақытта @emle.kz, @tilalemi.kz сайттарынан аудио нұсқасын тыңдай отырып жазды. Диктант аяқталған соң аталған сайттарда диктанттың дұрыс нұсқасы шығарылып, мұғалімдер мен оқушылар өз жұмыстарын тексерді. Осындай игі бастамаларды ел ішінде насихаттап, лайықты жүзеге асыру – баршамыздың міндетіміз.

Қорыта келгенде, Елбасы идеясының ауқымы өте кең, бірақ түпкі мақсаты – саналы ұрпақ, өркениетті қоғам қалыптастыру. Ал, қазіргі атқарылып жатқан іс-шаралар – сол мақсатты жүзеге асырудың тетіктері.

Замединова А.Қ.