“Мың алғыс Сізге, Ардагер!” атты мерекелік концерт
Бүгінгі, 09.05.2018 ж. Ұлы Жеңіске 73 жыл толу мерекесіне орай мектеп әкімшілігінің ұйымдастыруымен білім ордасының алдында Нұр Ақтөбе мөлтек ауданының тұрғындарына арнап, “Мың алғыс Сізге, Ардагер!” атты мерекелік концерт өткізілді. Көктемнің мамыражай күндерінде тойланатын Ұлы Жеңіс күні мейрамы – ардагер ата, әжелеріміздің ерен еңбегі мен қайтпас ерліктеріне тағызым етіп, майданнан оралмаған боздақтарды еске алатын күн. Бүгінгі мерекелік шарада көрермен қауым назарына сұрапыл сұм соғыс жылдарын еске салған тарихи әуендермен бірге, Ұлы Жеңісті жырлайтын бейбіт күнгі патриоттық әндер еліміздің тәуелсіздік көкжиегінде әуелетіп шырқалды. Салтанатты концерттің барысында қатысушылар мен көрермен қауым Ұлы Отан соғысында қаза тапқандарды бір минут үнсіздікпен еске алды. ІI дүниежүзілік соғыстағы ерлікті насихаттайтын қойылымдар да шарадан шет қалмады. Ардагерлер мен тұрғындар театрланған көріністерді тамашалап, от пен оқтың арасындағы шайқасқа куә болды. Еліміздің Ұлттар Бірлігін сипаттайтын, ұлттық болмысты ұлықтайтын, ер жүрек елжандылықты бейнелейтін мың бұралған бишілердің орындауындағы билер де көпшілік назарына тарту етілді. Ардагерлерімізге құрмет көрсетіп, елдік пен ерлікті жырлаған салтанатты мерекелік шараға жиналған қауым мерекелік көңіл-күй сыйлаған ұйымдастырушы, өнерпаз ұстаздар мен оқушыларға ризашылықтарын білдіріп, ерекше әсермен тарасты.