Сәтті сенбіліктер

«Тазалық табалдырықтан басталады » дейді халқымыз. Сары желекті күз мезгілі де келді. Ендігі жерде қураған ағаш бұтақтары мен шөптерді, күл-қоқыстарды жиып – шығару жұмыстары да басталып кетті. Мектеп ауласын ретке келтіріп, ұқыпты ұстау санитарлық талап қана емес, мәдениет пен талғамның белгісі. Содан болар,  көктем, күз мезгілдерінде №60 ЖББОМ-тің ұстаздары және оқушылары сенбілікке шығуды дәстүрге айналдырған. Олар қоршаған ортаны таза ұстауға өз үлесін қосады. Биылғы жылымызда әдеттегідей мектеп ауласын артық заттардан тазартудан бастау алды. Мектеп ауласын қоқыстан арылту мақсатымен  бір жылдық  жоба қолға алынған еді.

Соның нәтижесінде қыркүйек, қазан айларында білім ордамыздың  ұстаздары және оқушылары әр сенбі күні кезекті тазалықты жүзеге асырады. Жоғарғы сынып  6,7,8, класс оқушылары өздеріне бекітілген сенбі күнгі тазалықты ойдағыдай атқарады. Бұл сенбілікте оқушылар мектеп айналасын қоқыстардан тазарту, ауланы сыпыру сияқты жұмыстар жасайды.  Мәселен, жүрме жолдарды, мектептің алдын артық шөптерден тазарту. Сонымен бірге  мектебіміздің ұстаздары  әр сенбі күні сыртқы тазалықты қарқынды деңгейде іске асырады. Ағаштардың үлкен бұтақтарын кесу, мектеп ауласындағы қураған майда шөптерді жұлу сонымен қатар діңі таза ағаштардың түптерін ақтау секілді жұмыстарды жасайды. Әрине екі айлық  сенбілікпен барлық шаруа атқарылды деуге әлі ерте. «Тазалық – денсаулық кепілі» дейтін болсақ, бұл бағыттағы шараларды жандандыра түсу барынша маңызды. Өйткені мектеп ауласының ажары бәрімізге де сын.  Қоғамдық жұмыс соның ішінде сенбілік жыл сайын ұйымдастырылып тұратын шараның бірі десек болады.

Ең бастысы, мұндай игілікті шараларда бір-бірімізге барынша қолдау білдірейік, ағайын!

Ілімбаева А.С.