Тарих – өткенге сабақ, келешекке – өнеге…

«Бүгінгі күнді түсініп – түйсіну үшін де, болашақтың дидарын көзге елестету үшін де, кешегі кезеңге көз жүгіртуіміз керек» – деп көшбасшымыз, елбасы Нұрсұлтан Әбішұлы тамыры тереңде жатқан, ата-бабаларымыз ізгі жолын салған өткен тарихымызды білудің, құрметтеудің маңызы зор екенін атап өткен. Себебі тарих – біздің істеріміздің өткенінің куәсі, қазіргіміздің үлгісі мен өнегесі, ал болашағымыздың асыл қазынасы.

Өткен тарихымыздағы халқымыздың кешкен қиындықтары мен  бейбіт күн үшін күрескен ерліктері мен еңбектерін бүгінгі ұрпаққа жеткізуде, олардың саналы азамат болып өсуіне үлес қосуда  ұстаздардың еңбегі зор. Оның бір дәлелі,  2017 ж. қазан айының 9-14 күндері аралығында Ақтөбе қаласының №60 жалпы білім беретін орта мектебінде «Тарих – ғасырлар куәсі» тақырыбында тарих әдістемелік бірлестігінің пәндік апталығы өтті.

Пәндік апталық-оқушыларға ел тарихын танып-білуде тарихи тұлғалардың қоғамдағы қызметтерінен үлгі алу, өзіндік ой-пікір қалыптастыру  мақсатында жоспарланған-ды.

Апталықдүйсенбі күні салтанатты жиын түрінде ашылып, 10 «Ә» сынып оқушылары ұлы ғұламалар – Геродот, Цыма Сянь, Н.Х. Дулати рөлдерін актерлық шеберлікпен сомдап, оқушылардың тарихи адамдарға деген құрметін арттырып, өз елі үшін игі жасауға шақырды. Сондай-ақ тарих пәнінің ерекшеліктері туралы айтылып, ақын-жазушылардың өлеңдері мен қанатты сөздері жатқа оқылды.

Апталық  аясында ашық сабақтар, сыныптан тыс пәндік сайыстар,танымдық-зияткерлік сайыстар ұйымдастырылды. Оқушылардың тарихи танымын, пәнге деген қызығушылығы мен білімдерін арттыру мақсатында өткен ашық сабақтар «үлгілі» деп танылса, жас мамандар А. Есентемір, Ә. Бердіғалиева, А. Ниязмағамбетованың ашық сабақтары ерекше жаңашылдықпен, үлкен талпыныспен өткізіліп, оң бағасын алды. Пән мұғалімдерінің  ізденісі тек ашық сабақтармен ғана шектелмей, сыныптан тыс шаралар да үлкен  дәрежеде оздырылды. Атап айтсақ, «ХХІ ғасыр көшбасшысы», «Я – патриот своей Родины» атты  сыныптан тыс пәндік шаралары оқушылардың жан-жақты қырларын ашып, зеректігі мен алғырлығын көрсете білсе, енді ғана тарих пәнінің қыр-сырымен танысып келе жатқан 5-6 сыныптар үшін ұйымдастырылған «Тарихи жұлдыздар» сайысы оқушылардың ерекше қызығушылықтары мен белсенділіктерін оятты. Ал 9-10 сыныптар аралығында өткізілген «Жасөспірім және Заң» тақырыбындағы шара оқушыларға өз құқықтары мен міндеттері жайлы ұғындырып, білімдерін шыңдады.

Апталықтың жабылу салтанаты мәжіліс залында ұстаздар мен оқушылардың қатысуымен үлкен дайындық пен нәтижелі еңбекке толы әдеби сазды кеш түрінде өтті. Кеште апталық аясында өткізілген іс-шараларда белсенділік танытқан оқушылар марапатталып, әрі қарай 10 «а» сыныбының көрінісі көрермендердің ықыласына бөленіп, патриоттық әндер шырқалып, мың бұралған биге ұласты.

Бүгінгі күн – ертең тарих. Сондықтан да тағылымы мол тарихты тереңнен қазған апталықтың оқушыларға берер өнегесі мен тәрбиесі мол болды.