«Тіл байлығы – ұлт мақтанышы»

Бүгінгі жаһандану заманында еліміздің тірегі – ұлттық тіліміз, мәдениетіміз бен әдебиетіміз. Ел мен тіл – егіз ұғым. Елбасымыздың «Мәңгілік ел» идеясы – бабаларымыздан мирас болып жеткен ана тілімізбен тығыз байланысты. Сондықтан да «Мәңгілік елдің» өзімен бірге қатар жасасып, бірге дамитын «Мәңгілік тілі» болуы қажет. Болашағымызды баянды етер басты қаруымыз – тіліміз десек, өркениетті елдің өрісі қашан да білімді, саналы ұрпақпен кеңеймек. Саналы ұрпақ – өз ана тілін жетік меңгерген, терең ойланып, өз тілінде еркін сөйлей алатын ұрпақ. Саналы ұрпақ тәрбиелеу жолында ұстаздар қауымы аянып қалмақ емес.

Тіл – ұлттың мақтанышы, тірегі екендігіне кең түсінік бере отырып, оқушыларды елжандылыққа, туған тілін құрметтеуге, тілді ұлттық мұра ретінде қастерлеуге үйрету мақсатында №60 ЖББОМ-ның бастауыш кластар бірлестігінде, Қазақстан халқының тілдер күні мерекесіне орай, 10.09.18-14.09.18 аралығында «Тіл байлығы – ұлт мақтанышы» атты тілдер апталығы өтті. Тілдер апталығының жоспары құрылып, бекітілген бағдарламаға сәйкес іс-шаралар ұйымдастырылды.

10 қыркүйек күні Г.С.Қонарова, С.Ж.Қожан, Ж.Алдиярова, А.Отаралина тіл мерекесінің ашылу салтанатын өткізіп, апталық аясындағы іс-шаралармен таныстырды. Тілдер апталығы барысында 1-4 – класс жетекшілері «Мен тіліммен мақтанамын әлемге» атты тәрбие сағаттарын жүргізсе, 3-4-кластар аралығында 11 қыркүйекте қазақ тілін дәріптеу мақсатында қабырға газеттері шығарылып, өзара сайысқа түсті. Қабырға газеттерінің ерекшеліктері, мазмұндылығы ескеріле отырып, 3 «Д», 3 «Ж», 3 «Л», 3 «О» кластары және 4 «Ғ» класының оқушысы Құдайбергенов Мейірбек 1-орынға, 3 «А» – класы 2-орынға, 3 «Г», 3 «Л» кластары 3-орынға ие болды.

Оқушыларды көркем сөйлеу мен тіл мәдениетін қалыптастыру мақсатында 12 қыркүйек күні «Туған тілім – тірлігімнің айғағы» тақырыбында 2-кластар арасында мәнерлеп оқудан сайыс өтсе, әрі қарай апталық барысы 3-кластар арасында «Ана тілім – асыл қазынам» тақырыбында шығарма жазу байқауымен жалғасын тапты. Байқау барысында шығарманың сауатты жазылуына және көркемдігіне, тақырыпты аша білуі мен мазмұнына көңіл аударылды. Байқау қорытындысы бойынша 3 «О» класс оқушысы Жандуллина Інжу бас жүлде алса, 3 «Ж» оқушысы Серғали Асылжан 1-орын, 3 «Д» класс оқушысы Дарменова Меруерт және 3 «М» класс оқушысы Жумагазин Аят 2-орын, 3 «Ә» класс оқушысы Түлкібай Ақниет, 3 «Б» класс оқушысы Нугуметова Аида және 3 «И» класс оқушысы Канафина Сария 3-орын алды.

Оқушыларды адамгершілікке баулу, сөйлеу шеберлігін арттырып, сөздік қорларын молайту мақсатында 14 қыркүйекте 4-кластар арасында «Жалғасын тап» мақал-мәтелдер сайысы ұйымдастырылған болатын. Оқушылар «Алғырлар», «Бірлік», «Ынтымақ», «Тапқыр» топтары болып мақал-мәтел айтудан жарысқа түсіп, жүйрік атануға талпынды. Сайыс нәтижесінде «Тапқырлар» тапқырлықтарын көрсетіп 4-орын алса, «Ынтымақ» тобы ауызбіршілігін танытып 3-орын, «Алғырлар» тобы алғырлықтарының арқасында 2-орын, ал бірлікті ту еткен «Бірлік» тобы 1-орын алып, жеңіске жетті.

Тілдер апталығының жабылуында өз білімділіктерін көрсетіп белсенділік танытқан оқушыларға мадақтау қағаздары табыс етілді. Оқушыларға терең білім мен саналы тәрбие беретін білім ордамызда осындай бағыттағы іс-шаралар жалғасын таба бермек.