«Үздік мұғалім-2019» байқауының 100 000мың теңге сыйақысы кімге бұйырды?

Ақтөбе қаласы №60 жалпы білім беретін орта мектебінде аталмыш жылдың 6 маусымы күні дәстүрлі шаралардың біріне айналған «Үздік мұғалім-2019» байқауы ұйымдастырылып, өз жеңімпазын анықтады.

2018-2019 оқу жылының басында жарияланған байқау  қатысушыларды бірнеше кезеңдер бойынша  іріктеп, 10 үміткер топ жарып,ақтық сынға  суырылып шыққан болатын.

«Жігітте де жігіт бар,азамат жөні бір басқа,

Жүйрікте де жүйрік бар, қазанат жөні бір басқа» демекші, жүзден жүйрік, мыңнан тұлпар  шыққан қазанаттарымыз өскелең ұрпақты оқыту мен тәрбиелеудегі  шығармашылық жетістіктері,жаңартылған білім беру технологияларын дамытуы, жаңа мазмұн,тың  идеяларға толы таныстырылымдарын  ортаға сала отырып, бой жарыстыратын емес,ой жарыстыратын сында өздерінің ұшқыр ой,терең білімдерін жұртшылыққа жаңа  қырынан көрсете білді.

Мұғалім мәртебесін көтеру,озық іс-тәжірибені насихаттау,шығармашыл мұғалімдердің  тәжірибесін тарату мақсатында ұйымдастырылған бұл додада шашасына шаң жұқтырмайтын сәйгүліктеріміз,шығармашыл  ұстаздарымыздың  кәсіби шеберлігі,ой сонылығы, сахна мәдениеті,сөз саптауы, әртістік қабілеті де назардан тыс қалмады.

Байқауға қатысушы қазанаттарымыз  оқыту мен тәрбиелеудегі түрлі әдіс-тәсілдерді қолдана отырып, меже сызығында өзіндік дара жолдарын  қалдырды.

Нәтижесінде,қазылар алқасының шешімімен:

Бас жүлдені иеленген физика пәнінің мұғалімі Илиясова Асель Жалмурзаевна  100 000 (жүз мың теңге )  көлеміндегі сыйақыны жеңіп алды.

І орын және 70 000 (жетпіс мың теңге ) көлеміндегі сыйақы иегері-  тарих  пәнінің мұғалімі Сыдықова Алтынгүл Сыражовна;

ІІ орын және 50 000 (елу мың теңге ) көлеміндегі сыйақы иегері – ағылшын тілі пәнінің мұғалімі Боқаева Алмагүл Закарияқызы;

ІІІ орын иегерлері – ағылшын тілі пәнінің мұғалімдері Көпжан Серік Смағұлұлы және  Сыдықова Жанар Айдаровна 30 000 (отыз мың теңге ) көлеміндегі сыйақыны қанжығаларына байлады.

Айтулы сында бабы мен бағы қатар шапқан, ел ертеңі жастардың тәрбиешісі, жаңалықты жатсынбай қабылдайтын ізденімпаз 5 мұғалім  өз биігінде  шығармашылықтарымен танылып,10 000 (он мың теңге) көлеміндегі сертификаттар  және түрлі номинациялармен марапатталды.

Жеңімпаздарды жүлделі жетістіктерімен құттықтай отырып,шығар шыңы биік,алар асулары асқақ болсын дейміз!