Ұлы мамандық иелеріне құрмет «Үздік мұғалім-2018» конкурс-марафоны

«Ұстаз мамандығы – барлық мамандықтың анасы» деп халқымыз бекер айтпаған. Ұстаз берген тәрбие – әрбір жанның өміріне бағыт-бағдар берер шамшырақ секілді. Өйткені ақиық ақын да, ғұлама ғалым да, ел қорғаған батыр да, тегеуріні темір балқытқан ұста да, он саусағынан өнері тамған шебер де, көк күмбезден асып аспан әлеміне жол тартқан ғарышкер де ұстаздан тәлім алған. Сондықтан ұлағатты ұстаздарға бүкіл адам баласы әрдайым құрметпен бас иеді.

Биылғы оқу жылы ұстаздар үшін қарқынды жүріп, білім саласында оң өзгерістер белең алуда. Осыған орай, 2018 жылдың 30 мамыр күні, Ақтөбе қаласындағы бағыты айқын, еңсесі биік білім ордаларының бірі – №60 жалпы білім беретін орта мектебінде «Үздік мұғалім-2018» конкурс-марафонының ақтық кезеңі ауқымды түрде аталып өтті. Аталмыш шара «Болашаққа бағдар: Рухани жаңғыру» бағдарламасын іске асыру негізінде мектеп әкімшілігінің қолдауымен бастау алды. Ұстаздарға арналған конкурс оқу жылының басында бекітілген Ережеге сәйкес 6 кезеңді қамтыды. Мұғалімдердің мәртебесін көтеру, озық іс-тәжірибені насихаттау, жаңашылдықпен жұмыс жасайтын, шығармашыл мұғалімдердің тәжірибесін тарату мақсатында ұйымдастырылған бұл шараның алғашқы кезеңдерінде өзін білімді, шығармашыл, белсенді маман ретінде көрсетіп, топ жарып шыққан 10 мұғалім ақтық кезеңге жолдама алды.

Дара жолды саралайтын конкурстың соңғы кезеңінде мұғалімдер өздерінің білім мен тәрбиені ұштастырған ұстаздық жолымен таныстыру арқылы тыңғылықты атқарған еңбегін, кәсіби шеберлігі мен шығармашылығын көрсетті.

Байқау қатысушылары ашық түрде, қазылар алқасының шешімімен бағаланды. Тура шешіммен қашан да әділдік ту еткен әділқазылар құрамында  № 60 жалпы білім беретін орта мектебінің директоры  – А.А.Тажимишев, жалпы ата-аналар комитеті қамқоршылық кеңесінің төрағасы – Б.Әлиұлы, № 60 ЖББОМ кәсіподақ комитетінің төрағасы – Ж. Қасымов, директордың оқу ісі жөніндегі орынбасары – Б.Х.Садыкова, директордың оқу-әдістемелік ісі жөніндегі орынбасары – М.Н. Ербозымова, № 60 ЖББОМ директорының тәрбие ісі жөніндегі орынбасары – Д.Н. Кудайбергенов болды.

Байқау қорытындысы бойынша қазылар алқасының шешімімен Бас жүлдені иеленген өнегелі істерімен кейінгі буынға үлгі болар, білікті ұстаз, өз мамандығының шебері, қазақ тілі мен әдебиеті пәні мұғалімі Романова Мейрамкуль Картаевна 100 000 теңге көлеміндегі сыйақыны жеңіп алды. І орынды география пәні мұғалімі Мажитова Шынаргуль Умирзаковна 70 000 теңге, ІІ орынды орыс тілі мен әдебиеті пәні мұғалімі Акилбекова Жанар Сагиндыковна 50 000 теңге, ІІІ орынды иеленген информатика пәні мұғалімі Таурбаев Талгат Рустемович және орыс тілі мен әдебиеті пәні мұғалімі Бекетова Шынар Бекетқызы 30 000 теңге көлеміндегі сыйақыларды қанжығаларына байлады. Білім мен біліктілікті талап ететін сайыста бақ сынасқан 5 мұғалім, қазақ тілі мен әдебиеті пәні мұғалімі – А.С.Кужахметова, бастауыш класс мұғалімі – С.И.Есенгазина, тарих пәнінің мұғалімі – А.С.Сыдыкова, математика пәнінің мұғалімдері – А.Қ.Оразова, М.М.Баймухамбетова өзіндік қырларымен танылып, 10 000 теңгені құрайтын сертификаттармен қоса, әр түрлі номинациялармен марапатталды.

Аталмыш іс-шара соңында мектеп директоры Тажимишев Абзал Амантайұлы ұстаздарды жүлделі орындарымен құттықтап, конкурстың жүлде қорындағы 330 000 теңге мектебіміздің қосымша ақылы білім беру қызметі (ДПОУ) табыстарынан бөлінгендігін атап айтты.

Білім ошағында бұл күнгі мектеп әкімшілігінің ұйымдастыруымен өткен іс-шара ұстаз мәртебесін көтеруге көп септігін тигізді. Қашан да болсын, ұстаздарға құрмет жоғары болған. Бүгіннен немесе кешеден ғана ұлы мамандық иелеріне құрмет көрсетіліп келе жатқан жоқ, ықылым заманнан бері ұстаздықтың шоқтығы биік тұр. «Тамшысымен тас тесетін бейнебір су тәрізді» (әл-Фараби) жандарға ілтипат таныту – адамгершілігіңнің ілгері басуының бір қадамы. Өйткені, ұстазға құрмет көрсету – білім мен ғылымның дамуына үлес қосумен тең.

Садырова А.К. – қазақ тілі мен

әдебиеті пәні мұғалімі