«Өнерлінің өрісі кең»

«Өнерлі өрге жүзеді», – дейді дана халқымыз. А.Байтұрсынов айтқандай, жылуына қарай тірнек өнері, сұлуына қарай көркем өнері қызмет етеді. Тірнек өнері мен көркемөнерді қатар қояр болсақ, жасөспірімдерді тәрбиелеуде бәрін алдына тосып отырған ата-аналарымыз балаларының жан-жақты болғанын қалайды. Көрнек өнеріне ғалым сәулет (архитектура) өнерін, сымбат (скульптура) өнерін, кескін (живопись) өнерін, әуен (музыка) өнерін және сөз (әдебиет) өнерін жатқызады.

Оқу жылының басында жоғарыда аталған өнер түрлерін меңгерту, оқушылардың сабақтан тыс бос уақытын тиімді ұйымдастыру мақсатында үйірме жұмыстары жолға қойылды. Үйірме жұмысын жоспарлауда ата-аналардың сұранысын ескере отырып, әр кластан қатысуға тілек білдірген оқушылардың тізімі жасақталып, жоспарлары бекітілді.

Мектепте балаларды халықтық өнерге баулуда, көркемдік шеберліктің тәсілдеріне үйретуде «ART LINE» үйірмесі еңбек етуде. Үйірмеге келген оқушылар үлкен қызығушылықпен жұмыс жасап, бейнелеу өнеріне, мүсін өнеріне, сәндік-қолданбалы  өнер мен тігін өнеріне бейімділік қабілеттерін арттырып, шығармашылық шеберліктерін шыңдап жатыр. Үйірмеге 11 мен 14 жас аралығындағы балалар тартылды.

Мектебімізде «Домбыра» үйірмесі мен «Әсем гүлдер» би үйірмесі де жұмыс жасауда. Би үйірмесіне  9 бен 11 жас аралығындағы жеткіншектер қатысып, ұлттық және қазіргі заманауи билерді үйренуде.

Өнер үйірмелерімен қатар оқушылар арасында салауатты өмір салтын насихаттайтын спорттық секциялар да бар. Олардың қатарында футбол, волейбол, баскетбол, гір спортын атап өтуге болады. Бұл секцияларға 11 мен 15 жас аралығындағы балалар қатысады. Шахмат, дойбы, тоғызқұмалақ секілді ойын түрлерін насихаттайтын үйірмелер де жұмыс жасауда.

Барлық өнердің төресі – сөз өнері екені ақиқат. Осы өнердің қыр-сырын танытып, оқушылардың сөйлеу шеберлігін шыңдайтын «Зияткер» интеллектуалдық клубы да биылғы жыл алғаш рет өз жұмысын бастады. Клуб мүшелігіне 9-класс оқушылары қабылданды.

Бүгінгі заман – бәсекелестік пен жаңа технологиялар заманы, ғылым мен білім заманы. Бәсекеге қабілетті, функционалды сауатты, шығармашыл ұрпақ тәрбиелеу – біздің алға қойған мақсатымыз. Осы мақсатқа жету жолында үйірменің жұмысын ілгерілету алдыңғы орында тұрған мәселенің бірі. Өз ұрпағымыздың жан-жақты дамуына аянбай үлес қосып, жетістікке жету жолында қолдау жасау арқылы болашаққа сеніммен аяқ басамыз.

Ербозымова М.Н.