наурыз — думан, наурыз — шаттық мереке!

Қазақ жұртына көктемгі жаңарудың, махаббаттың, ақ пейіл мен татулықтың нышаны саналатын Наурыз мерекесі де келіп жетті. Тек адамзат қана емес, табиғаттың да жасарып, бой түзейтін шағы – Ұлыстың ұлы күнінің баршамыз үшін жолы да, жөні де бөлек. Ұлыстың ұлы күні әз Наурыз – ағаш бүршіктеп, төрт түлік мал төлдейтін, аң-құстың тұқымы өрбіп, ұлы табиғат жаңаратын жыл басы, көктем мерекесі.
Табиғаттың төсіне ірге көміп, мал емшегін емген қазақ ұлты үшін Әз Наурыздан артық мереке болған емес. Әрине, отардан мал-жаны аман оралып, ортасы толғанда қыстан сақтап отырған сүрісін, тәтті-дәрмегін, дәмді-құжырын дастарханға салып, ақ сақалды ата мен ақ жаулықты аналарын төрге оздырып, бата-тілек ағытылатын берекенің мерекесі. 1991 жылдан бері мемлекеттік мәртебеге ие болған Наурыз мерекесі қанатын кеңге жайып, халықтың қуанышын толықтырып келеді. Жыл өткен сайын Наурыз мейрамы елімізді мекендеген бүкіл халықтың, ұлт пен ұлыстың сағынып күтетін ортақ мерекесіне айналып, жаңа мазмұнмен, жарасымды сән-салтанатымен түрлене түсуде. Бүгінгі Ұлыстың Ұлы күнінде қаламыздың Алматы ауданында өткен мерекелік наурыз-думанда #60ЖББОМ ұжымы менмұндалаған ақшаңқан ағаш үйімен, көзтартар көрмесімен ерекшеленіп, көрермен қол соқпай қарап тұра алмайтын концерттік бағдарлама қойып, ұлттығымызды ұлықтайтын астың төресі — қазан-қазан наурызкөже мен дәмді бауырсақ ұсынып, қалың жұртшылықтың ыстық ықыласына бөленді. Мерекелік мейрамда түрлі əн, күй, би және қазақтың ұлттық ойындары: гір көтеру, арқан тартысу, қол күрес, қазақша күрес секілді ойын түрлері ойнатылды. Бүгінгі наурыз тойы барша жиналған қауымға ұмытылмас күн сыйлады деп сенеміз!